Սերգեյ Բաբլումյան, Sputnik.
Այսպիսով, Ելենա Եսենինան՝ երիտասարդ և գեղեցիկ պոետը, կոմպոզիտորն ու երգչուհին, նպաստեց հայ-ռուսական կապերի ամրապնդմանը գրեթե նույնքան արդյունավետ, որքան կարելի էր սպասել հայ-ռուսական բարեկամության միությունից, եթե այն իրականում գոյություն ունենար: Այժմ էլ, հավանաբար, սպասել է պետք ամեն հայկականի երկրպագուների ակումբի ստեղծմանը: Դե իհարկե՝ «Աշոտ» անվան տակ:
Հեղինակը, որն այս օրերին Ամերիկայում է, հաշվի առնելով, որ նրան բախտ է վիճակվել նման անունով որդի ունենալ, ստիպված է բազմաթիվ շնորհավորանքներ ընդունել: Բայց քանի որ Միչիգանի ընկերների թվում էլ քիչ չեն Աշոտ անունը կրողները, բոլորին էլ այս ուրախությունը բաժին է հասնում:
Ինչո՞վ է պայմանավորված այս հասարակ և, ընդանուր առմամբ, ոչ այդքան հանճարեղ երգի խելահեղ հաջողությունը: Հենց դրանից: Հենց նրա պարզությունից ու անկեղծությունից, որը որոշակի գաղտնիության շղարշով է պատված: Ո՞վ է իրականում այդ Աշոտը, որը գերել է Լենա անունով աղջկա սիրտը, և արդյո՞ք նա իրականում գոյություն ունի, թե՞ ոչ՝ բոլորին է հետաքրքիր: Մյուս կողմից, բացառված չէ, որ յուրաքանչյուր Աշոտ կցանկանար մտածել, որ այդ երգը հենց իր մասին է:
Ինչքա՞ն Աշոտ կա Հայաստանում, Մոսկվայում, ամբողջ աշխարհում… Հիմա պատկերացրեք նույն երգը, սակայն մի փառահեղ հայտնի «աստղի» կատարմամբ՝ շուրջբոլորը պարուհիներ ու ձայնակցողներ. երաժշտության և բառերի հմայքն անմիջապես հօդս կցնդեր: Իսկ այսպես` ազնիվ է, մաքուր, անկեղծ ու բխում է ամբողջ սրտից: Շնորհակալություն, Լենա ջան:
