ԵՐԵՎԱՆ, 30 հոկտեմբերի–Sputnik. Տնտեսական հարցերի հանձնաժողովի փոխնախագահի պաշտոնում ՀՀ պատվիրակության անդամներն առաջարկել են ՀՀ ԱԺ «Ծառուկյան» խմբակցության քարտուղար Վահե Էնֆիաջյանի թեկնածությունը։ Այս մասին հրավիրված ասուլիսի ժամանակ հայտնեց ՀՀ ԱԺ «Ելք» խմբակցության պատգամավոր Գևորգ Գորգիսյանը։
«Էնֆիաջյանի թեկնածությունն առաջարկելու համար ստորագրություններ հավաքեցինք, և շուտով Վահե Էնֆիաջյանը կստանձնի այդ պաշտոնը», — ասաց նա։
Վահե Էնֆիաջյանն էլ հայտնեց, որ հանձնաժողովի նիստում իրենք ներկայացրել են Հայաստանում ինովացիոն տեխնոլոգիաների արդի իրավիճակը` մատնանշվելով այն խոչընդոտները, որոնք թույլ չեն տալիս ոլորտի առավել զարգացմանը:
«Հստակ մատնանշել եմ, որ եթե մենք բաց սահմաններ ունենայինք, և տարածաշրջանում հարևան պետությունների կողմից վարվող քաղաքականությունը չլիներ, մենք ավելի լավ արդյունքներ կունենայինք։ Ես այս մասին խոսեցի», — նշեց Էնֆիաջյանը։
ՍԾՏՀ ԽՎ-ում ՀՀ ԱԺ պատվիրակության ղեկավար Գագիկ Մինասյանն էլ հայտնեց` ՍԾՏՀ ԽՎ-ի ստեղծման հիմնական գաղափարն է ՍԾՏՀ անդամ պետությունների միջև տնտեսական համագործակցության ամրապնդումը: Նա վերահաստատել է, որ անհրաժեշտ է պահպանել կազմակերպության տնտեսական բնույթը` խուսափելով այն չափից ավելի քաղաքականացումից:
Հիշեցնենք, որ հոկտեմբերի 25-27-ը Դոնի Ռոստովում տեղի ունեցած Սևծովյան տնտեսական համագործակցության խորհրդարանական վեհաժողովի Իրավական և քաղաքական հարցերի հանձնաժողովի 50-րդ, ինչպես նաև Մշակութային, կրթության և սոցիալական հարցերի հանձնաժողովի 49-րդ նիստերի աշխատանքներին մասնակցել են ՀՀ ԱԺ պատվիրակության ղեկավար Գագիկ Մինասյանը և պատվիրակության անդամ Աղվան Վարդանյանը։
