ԵՐԵՎԱՆ, 17 նոյեմբերի — Sputnik. Հայտնի ռուս հեռուստահաղորդավար Անդրեյ Մալախովն առաջին անգամ հայր է դարձել, հայտնում է StarHit գլամուրային ամսագիրը։
Նախօրեին ժամը 23:30–ին հեռուստահաղորդավարի ու իր կնոջ` Նատալյա Շկուլևայի (6 տարի է, ինչ ամուսնացած են) առաջնեկը ծնվեց մերձմոսկովյան հիվանդանոցներից մեկում։ Մալախովի ղեկավարած առցանց պարբերականի տվյալներով՝ նորածինն ու երիտասարդ մայրիկն իրենց լավ են զգում։
«Երեխայի անունը դեռ պետք է ընտրենք. ուզում ենք տեսնել, թե ինչ բնավորություն է ունենալու։ Սպասում եմ այն պահին, երբ կկարողանամ փոխել փոքրիկիս առաջին տակդիրը»,– StarHit-ի հետ հեռախոսազրույցի ժամանակ պատմել է երիտասարդ հայրիկը։
Նորածնի քաշը 4,020 կգ է, հասակը`54 սմ։ Հեռուստահաղորդավարը ներկա չի եղել ծննդաբերության ժամանակ, սակայն հիվանդանոցում սպասել է երեխայի լույս աշխարհ գալուն։
Ավելի վաղ հայտնել էին, որ Մալախովին կարող են հարցաքննության կանչել հայտնի դերասան և ռեժիսոր Ջիգարխանյանի գրասենյակում տեղադրած լսող սարքի գործով։
Ինչպես հայտնում է РЕН ТВ–ն, քանի որ թաքնված տեսախցիկի ձայնագրությունը ցուցադրվել է Անդրեյ Մալախովի ծրագրի ուղիղ եթերում, հեռուստահաղորդավարը ցուցմունք կտա Արմեն Ջիգարխանյանի գրասենյակում լսող սարքի տեղադրման վերաբերյալ։
