ԵՐԵՎԱՆ, 30 նոյեմբերի — Sputnik. Ռուսաստանը 2018 թվականին Հայաստանի համար կպահպանի հազար խորանարդ մետրի դիմաց 150 դոլար գինը։ Այս մասին ասվում է համապատասխան միջպետական համաձայնագրում, որին ՀՀ կառավարությունը այսօր հավանություն տվեց։
Հիշեցնենք, որ 150 դոլար գինը (նախկին 165–ի փոխարեն) սահմանվել է 2016 թվականի ապրիլի 7–ին ու հաստատվել է հոկտեմբերին Ռուսաստանի վարչապետ Դմիտրի Մեդվեդևի Երևան այցելության ժամանակ։
Նշենք, որ 2017 թվականի առաջին կիսամյակում Հայաստանը 1 միլիարդ 275 միլիոն խորանարդ մետր գազ է ներմուծել։ Դրանից 1 միլիարդ 88 միլիոնը եկել է Ռուսաստանից (սպառողների լայն շրջանի համար), 184 միլիոնը` Իրանից (Երևանյան ջերմաէլեկտրակենտրոնի համար)։ Ներմուծումը Ռուսաստանից աճել է գրեթե մեկ երրորդով։
Հիշեցնենք, որ 2011 թվականից Հայաստանում ռուսական գազի գինը սկսել էր ավելանալ։ Պայմանականորեն Երևանը նախկին գումարն էր վճարում, բայց պաշտոնական ու իրական գնի տարբերությունը որպես պարտք էր գրանցվում։ 2013 թվականի վերջին այն հասավ 300 միլիոն դոլարի։ Դրա փոխարեն, 2013 թվականի դեկտեմբերին, «Գազպրոմը» Հայաստանի կառավարությունից ստացավ երկրի գազատրանսպորտային համակարգի բաժնետոմսերի 20%–ը` 100% –ով դառնալով դրա կառավարիչը։