ԵՐԵՎԱՆ, 1 դեկտեմբերի — Sputnik, Նելլի Դանիելյան. Արմավիրի մարզի Ջրարբի գյուղի դպրոցում օրեր առաջ տեղի ունեցած դասադուլից ու մարզպետի այցից հետո, չնայած ֆինանսական միջոցների բացակայության մասին հայտարարություններին, հենց հաջորդ օրը գյուղի դպրոցում մեկնարկել են ջեռուցման համակարգի տեղադրման աշխատանքները։ Այս մասին Sputnik Արմենիային հայտնեց մարզպետարանի Կրթության, մշակույթի և սպորտի վարչության պետ Գայանե Սայադյանը։
«Արդեն ավարտվում են ջեռուցման երկու կաթսայի տեղադրման աշխատանքները։ Հենց հաջորդ օրն ամեն ինչ բերվել էր` մինչև վերջին պտուտակը` սկսած ջեռուցման կաթսաներից, մարտկոցներից։ Աշխատանքներն ընթանում են, երևի հաջորդ շաբաթվանից ջեռուցման մեկնարկը կտրվի»,- ասաց Սայադյանը։
Իսկ մինչ այդ դպրոցը, ինչպես նախկինում, ջերմացվում է հեղուկ վառելիքի վառարաններով։ Դասերը շինարարության պատճառով չեն ընդհատվել։
Մեր հարցին, թե մարզպետին որտեղից հաջողվեց գումար հայթայթել դպրոցը ջեռուցման համակարգով ապահովելու համար, քանի որ մինչ այդ հայտարարվում էր, որ գումար չկա, Սայադյանը դժվարացավ պատասխանել։
«Դա մարզպետն է արել, ես դրանից տեղյակ չեմ»,- ասաց նա։
Այն, որ դպրոցը համառ պայքարի արդյունքում ջեռուցում կունենա, գյուղացիներին ոգևորում է։ Բայց մտահոգում է այլ բան` որքանո՞վ այն արդյունավետ կլինի դպրոցի կիսավեր շենքում։
«Դպրոցի պատուհանները բացակայում են, պոլիէթիլենով են ծածկված։ Այս մասով խոստացել են մեկ շաբաթվա ընթացքում մեզ պատասխանել` վերանորոգում է արվելու, թե դպրոցի նոր մասնաշենք պիտի կառուցվի»,- մեզ հետ զրույցում ասաց գյուղի բնակիչ Սարիբեկ Մկրտչյանը։
Ի դեպ, Ջրարբիի դպրոցի շենքն ընդհանրապես դպրոց չէ։ Այն ժամանակին պատկանել է թռչնաբուծարանին, իսկ երբ գյուղին դպրոց է հարկավոր եղել, հարմարեցվել է դպրոցական պայմաններին, ուստի և ապահովված չէ ոչ միայն ջեռուցմամբ, այլև սանհանգույցով ու կոյուղով։
Հիշեցնենք` նոյեմբերի 20-ին Ջրարբիի դպրոցում դասադուլ էր հայտարարվել։ Գյուղի բնակիչները սպառնում էին փակել գյուղով անցնող հանրապետական նշանակության ավտոմայրուղին`մարզպետից պահանջելով բարելավել գյուղի դպրոցի շենքային պայմաններն ու ապահովել ջեռուցմամբ։
Գյուղ այցելած մարզպետ Աշոտ Ղահրամանյանը խոստացել էր 10 օրում լուծել դպրոցի ջեռուցման հարցը։
