ԵՐԵՎԱՆ, 11 դեկտեմբերի — Sputnik. Հայ կիսապաշտպան Հենրիխ Մխիթարյանը ծրագրում է իր կարիերայի մասին զրուցել «կարմիր սատանաների» մարզիչ Ժոզե Մոուրինյոի հետ։ Այս մասին գրում է Daily Star-ը։
Ժոզեն արդեն մեկ ամիս է` Մխիթարյանին չի ընդգրկում հիմնական հայտացուցակում, վերջին անգամ ֆուտբոլիստը դաշտ է դուրս եկել նոյեմբերին։
Ֆուտբոլիստն ու նրա ներկայացուցիչները պատրաստվում են «ՄՅ»-ի մարզչի հետ քննարկել Մխիթարյանի կարիերան Մանչեսթերում շարունակելու հարցը։
Իսկ այդ ընթացքում Հենրիխի երկրպագուները սիրելի ֆուտբոլիստի պաշտպանությանն ուղղված ակցիա են անցկացնում։ Նրանք արդեն գրոհել են Մորուրինյոյի Instagram-ի էջը` պահանջելով խաղադաշտ վերադարձնել ֆուտբոլիստին։
Սոցցանցերում տարածված բազում հեշթեգերին ավելացել է ևս մեկը։ Բլոգեր Տիգրան Քոչարյանն առաջարկել է Մխիթարյանին սատարել #Հենոդուխով կարգախոսով։
Ավելի վաղ երկրպագուները միայն լատինատառ էին գրում, որպեսզի տեսնեին ու հասկանային նաև մյուսները, հատկապես` «Մանչեսթեր Յունայթեդի» գլխավոր մարզիչ Ժոզե Մոուրինյոն։
Օրեր առաջ Մխիթարյանի տեղափոխության մասին հերթական տեղեկություն հրապարակեց իտալական Corriere dello Sport-ը։ Պարբերականը գրեց, որ Մոուրինյոն ուզում է ակումբ բերել «Ինտերում» խաղացող Ժուաու Մարիուին` Խուան Մատայի դիմաց։
«Սակայն «Ինտերը» պատրաստ է բանակցությունների գնալ, եթե ավելանա Մխիթարյանը։ Առայժմ բուն բանակցությունների մասին խոսելը վաղ է։ Միայն բանավոր խոսակցություններ են ընթանում ակումբների միջև»,- գրեց պարբերականը։
