ԵՐԵՎԱՆ, 14 դեկտեմբերի — Sputnik. Բանտում հայտնված լրագրողների քանակն ամբողջ աշխարհում նոր ռեկորդ է սահմանել, իսկ 2017 թվականի առաջատարն այս հարցում Թուրքիան է։ Այդ մասին հայտնում է Լրագրողների պաշտպանության կոմիտեի (ԼՊԿ) նախապատրաստած հատուկ զեկույցը` 2017 թվականի արդյունքներով։
«Երկրորդ տարին անընդմեջ իրենց մասնագիտական գործունեության համար բանտում հայտնված լրագրողների թիվը ռեկորդային թվի է հասել, քանի որ ԱՄՆ–ն և այլ արևմտյան պետություններ չեն կարողանում համաշխարհային գլխավոր «բանտապանների» երկրներում` Թուրքիայում, Չինաստանում և Եգիպտոսում բարելավել մամուլի ազատության հետ կապված ճնշող իրավիճակը», – գրված է զեկույցում։
Զեկույցի տրամաբանության համաձայն` հենց ԱՄՆ–ն և արևմտյան պետությունները պետք է հետևեն դատապարտված լրագրողների ճակատագրին, քանի որ նրանց «ռեպրեսիվ ռեժիմը կարող է մեկուսացնել` իրենց ավտորիտար գործողությունների համար»։ Էրդողանի ռեժիմի զոհ են հաճախ դառնում էթնիկ փոքրամասնությունների ներկայացուցիչ լրագրողները։
«Աշխարհով մեկ բանտարկված բոլոր լրագրողների գրեթե 3/4 մեղադրվում են հակապետական գործունեության մեջ», – նշված է զեկույցում։
Սակայն նշվում է, որ Թուրքիայի պարագայում, ԼՊԿ–ն կապ չի տեսնում լրագրողների բանտարկման և նրանց մասնագիտական գործունեության միջև։ Լրագրողները նշում են նաև, որ երկրում խիստ գրաքննություն է գործում։ Թուրք իշխանությունների կողմից կիրառվող մեթոդները կարելի է անընդունելի անվանել, իսկ կառավարական ամենաթողության դեմ իրականացվող գործողություններն` անհրաժեշտ։
