ԵՐԵՎԱՆ, 6 մարտի — Sputnik. Գովազդային արշավի շրջանակում «Հարավկովկասյան երկաթուղի» ՓԲԸ-ն անվճար ուղևորափոխադրումներ է իրականացնում Երևան-Գյումրի-Երևան երթուղում գործող նոր ԷՊ2Դ արագընթաց էլեկտրագնացքով: Հաշվի առնելով անվճար երթևեկությամբ մեծ հետաքրքրությունը և պահանջարկի կտրուկ աճը՝ հայտնում ենք, որ մարտի 8-ից մինչև 11-ը կատարվելիք անվճար ուղերթերի տոմսերը տրամադրվելու են կայարանների տոմսարկղերում էլեկտրագնացքի մեկնման օրը Երևանում՝ սկսած ժամը 9:00-ից, իսկ Գյումրիում՝ 15:55-ից:
Մեկ անձին կարող է տրվել ոչ ավելի, քան 5 անվճար տոմս: Գնացքում կա 107 նստատեղ, կանգնած տեղեր նախատեսված չեն:
«ՀԿԵ» ՓԲԸ-ն պատասխանատվություն չի կրում հակառակ ուղղությամբ ուղևորների անվճար փոխադրման համար և հայտնում է, որ անվճար տոմսերով Երևանից Գյումրի (կամ հակառակ ուղղությամբ) մեկնած ուղևորները չեն կարող նույն տոմսերով անվճար վերադառնալ Երևան (կամ Գյումրի): Նրանց անհրաժեշտ է ընդհանուր հիմունքներով ստանալ Գյումրիից Երևան (կամ հակառակ ուղղությամբ) ուղևորվող արագընթաց էլեկտրագնացքի անվճար տոմսեր:
Կոնֆլիկտային իրավիճակների դեպքում երկաթուղին իրավունք է վերապահում իրեն դադարեցնել անվճար երթևեկությունը՝ նախօրոք տեղեկացնելով ուղևորներին ukzhd.am կայքում հայտարարության տեղադրման ու Երևանի և Գյումրիի կայարանների տեղեկատվական համակարգի միջոցով:
№100-101 Երևան-Գյումրի-Երևան նոր արագընթաց էլեկտրագնացքը աշխատում է ամեն շաբաթ՝ ուրբաթ, շաբաթ և կիրակի օրերին էքսպրեսի ռեժիմով՝ առանց բաժանիչ կանգառների, օրը 2 անգամ՝ ժամը 10:00-ին մեկնելով Երևանից Գյումրի և 16:55-ին հակառակ ուղղությամբ: Երթևեկության տևողությունը կազմում է 1 ժամ 59 րոպե:
Մարտի 16-ից հետո մեկ տոմսի գինը մեկ ուղղությամբ կկազմի 2,5 հազար դրամ:
