ԵՐԵՎԱՆ, 19 ապրիլի — Sputnik. Հրաշալի ջազային հայ երաժիշտ Տիգրան Համասյանը 2018 թվականի մայիսի 3–ին Պետերբուրգում կներկայացնի փետրվարին թողարկված իր տասներորդ` «For Gyumri» ալբոմը։ Ջազմենի առաջիկա ելույթի մասին տեղեկացնում է ԳԲՌ պետերբուրգյան հարթակը։
Համասյանի նոր ձայնասկավառակը նվիրված է իր հայրենի Գյումրիին ու պարզապես կոչվում է «For Gyumri»։ Մինի–ալբոմում 5 ստեղծագործություն կա, այն An Ancient Observer ալբոմի շարունակությունն է։
«Տիգրան Համասյանը նախկին ԽՍՀՄ տարածքի այն քիչ ջազային երիտասարդ երաժիշտներից մեկն է, որը միջազգային բեմում հաջողությունների է հասել։ 30 տարեկանում հայ երաժիշտը կարիերայում մեծ բարձունքների է հասել. տաղանդավոր երաժիշտը մեկը մյուսից հետևից հաղթանակներ է տանում տարատեսակ մրցույթներում։ Նրան առանձնացնում են որպես դաշնակահար, կոմպոզիտոր ու մշակող», – գրում է պարբերականը։
Պարբերականը նշում է, որ Համասյանն արդեն 10 ձայնասկավառակ ունի։ Առաջինը ձայնագրվել է 2011 թվականին Universal ստուդիայում ու ջազային ալբոմի համար ռեկորդային տպաքանակով է վաճառվել` 30 000 օրինակ։ Ձայնասկավառակը մեծ ճանաչում է ստացել Ֆրանսիայում ու Գրեմմիի ֆրանսիական տարբերակի` Victoires De La Musique մրցանակի է արժանացել։
«Տիգրանը շատ հմտորեն է դաշնամուր նվագում ու, անկասկած, խորապես զգում է մեղեդին. նա նույնքան պրոֆեսիոնալ է և՛ ջազ, և՛ դասական երաժշտություն, և՛ ժողովրդական հայկական, և՛ ժամանակակից մեղեդիներ նվագելիս։ Հայկական ավանդույթները զգացվում են նրա երաժշտության մեջ անկախ այն բանից` ինչ է նա նվագում` Worldmusic, ջազ կամ պրոգրեսիվ–ռոք», – նշվում է հրապարակման մեջ։
Հոդվածի հեղինակները նշում են, որ Համասյանը 30 տարեկան չկա, սակայն նա երաժշտական կարիերայում մեծ բարձունքների է հասել։ Նա ԱՄՆ–ում, Շվեյցարիայում, Ֆրանսիայում հեղինակավոր մրցանակների դափնեկիր է։ 2016 թվականին աշխարհի ամենահեղինակավոր ջազային մրցանակաբաշխության` Echo Jazz Awards–ի կողմից լավագույն ջազային մշակող է ճանաչվել։
