ԵՐԵՎԱՆ, 1 մայիսի — Sputnik. Նիստի չի տապալվի, իսկ վարչապետի ընտրության հետ կապված այս պահին ոչինչ ասել չեմ կարող։ Այս մասին այսօր ՀՀ Ազգային ժողովում լրագրողների հետ զրույցում ասաց Հանրապետական խմբակցության նախագահ Վահրամ Բաղդասարյանը։
Անդրադառնալով իր խմբակցության անդամների քվեարկությանը` Բաղդասարյանը նշեց.
«Կախված է պատգամավորների տրամադրվածությունից, բայց Հայաստանի Հանրապետությունը պիտի ունենա վարչապետ։ Եվ մենք չենք խոչընդոտելու ընտրություններին։ Մտավախություններն իզուր են` բոյկոտել չի լինելու»։
Վահրամ Բաղդասարյանն ավելի մանրամասնեց և ասաց, որ խոսքը քվորում ապահովելու մասին էր, իսկ խմբակցության մյուս անդամների փոխարեն ինքը չի կարող և իրավունք չունի որոշում կայացնելու։ «Երբ հարցերն ավարտվեն, մենք քննարկելու, յուրաքանչյուրի կարծիքն իմանալու և որոշում կայացնելու հնարավորություն կունենանք»,–նշեց Բաղդասարյանը և հավելեց, որ Սահմանադրությամբ սահմանված ժամկետներում մեր երկիրը կունենա վարչապետ։
Պատասխանելով լրագրողների` Սերժ Սարգսյանը մասնակցել է նիստերին, միջամտել է այս հարցի կողմնորոշման հարցում` Վահրամ Բաղդասարյանն ասաց, որ Սերժ Սարգսյանը դեռ իրենց կուսակցության ղեկավարն է, և գործադիր մարմնի նիստը ինքն է վարում։ «Բայց, իր խոստմանը համաձայն, նա չի միջամտել այս խնդիրների լուծման հարցում»։
Հիշեցնենք, որ Փաշինյանը վարչապետի պաշտոնի միակ թեկնածուն է։ Անցած գիշեր նա իր տեսաուղերձում հայտնել է, որ ՀՀԿ մտադիր է ձախողել նրա ընտրությունը։ Նա կոչ է արել իր կողմնակիցներին «հարյուր հազարներով հավաքվել Հանրապետության հրապարակում»` հույս ունենալով, որ մարդկանց ակտիվությունը կխափանի ՀՀԿ–ի ծրագրերը։
Փաշինյանի թեկնածությունն ապրիլի 30-ին առաջադրել է «Ելք» խմբակցությունը։ Սակայն ընդդիմադիրը վարչապետ դառնալու համար պետք է ստանա 53 ձայն 105 ձայնից։ Հետևաբար, նրա համար պետք է քվեարկեն ոչ միայն «Ելք» խմբակցությունը, «Ծառուկյան» դաշինքն ու ՀՅԴ–ն, այլև ՀՀԿ իշխող կուսակցության պատգամավորների մի մասը։
ՀՀ խորհրդարանը վարչապետի ընտրության հարցը կքննարկի այսօր` մայիսի 1-ին։ Ավելի վաղ ՀՀԿ մամուլի քարտուղար, խորհրդարանի փոխխոսնակ Էդուարդ Շարմազանովը հայտնել էր, որ խմբակցությունը կհայտարարի իր դիրքորոշման մասին Փաշինյանի ծրագիրը լսելուց հետո։
