ԵՐԵՎԱՆ, 3 սեպտեմբերի — Sputnik. Մոսկվայի գյուղատնտեսական տոնավաճառներում տեղեր կբացվեն հայկական ապրանքների համար։ Այդ մասին Sputnik Արմենիայի թղթակցին ասաց Ռուսաստանում Հայաստանի առևտրային ներկայացուցիչ Կարեն Ասոյանը։
Խոսքը վերաբերում է միջմարզային տոնավաճառներին, որտեղ Ռուսաստանի տարբեր անկյուններից բերված մթերք են վաճառում։ Տեղի արտադրողներին աջակցելու համար նրանցից գումար են վերցնում միայն կոմունալ ծառայությունների և տարածքը մաքրելու համար։
Այժմ Մոսկվայի իշխանությունները հայկական ապրանք վաճառողներին առաջարկել են նույն պայմանները։ Ավելին, տոնավաճառների ղեկավարությունը կհետևի, որ հայկական վաճառասեղաններին հայտնվեն միայն հայկական ապրանքներ։ Այդ մասին խնդրել է հայկական կողմը` ելնելով ոչ թե «սկզբունքից», այլ հասարակ պրագմատիզմից։
«Մեր միրգը, բանջարեղենը և պահածոները համեմատաբար թանկ են։ Իսկ հիմա ռուսական սպառողները ժամանակավոր դժվարություններ ունեն ազատ եկամուտների հարցում։ Ուստի մեր մատակարարները փորձում են չբարձրացնել գինը։ Առևտրականին այդքան շատ եկամուտ չի մնում։ Իսկ նրան մշտապես առաջարկում են ավելի էժան ապրանքներ, որոնց դեպքում օգուտն ավելի շատ է լինում։ Առևտուր թույլ կտան անել հուսալի մարդկանց, որոնք կդիմանան գայթակղությանը», — ժպտում է Ասոյանը։
Բայց ոմանք հենց իրենք են ուզում «պահել դեմքը»։ Այդ առևտրականների շարքում է հայկական պարենային ապրանքների ինտերնետային խանութի տերը։ Պարզ է, որ նրա համար ձեռնտու է հայկական ապրանքներ վաճառելը, որպեսզի գնորդներ գրավի իր առցանց առևտրի համար։
«Բայց, իհարկե, չի կարելի շնորհակալություն չհայտնել ռուսական մայրաքաղաքի իշխանություններին ուշադիր վերաբերմունքի համար», —ավելացրեց Ասոյանը։
Նշենք, որ Ռուսաստանը հայկական մրգի, բանջարեղենի և պահածոների գլխավոր շուկան է (ծավալով ավելի քան 90 տոկոս)։
