Ոստիկանությունը բացեց ընդդիմության ճանապարհը. տեսանյութ

Բաժանորդագրվեք
Yandex newsTelegram
Վահաններով ու մահակներով զինված ոստիկանները մի քանի շարքով պատ էին կազմել ԱԺ–ի մուտքերի մոտ։
ԵՐԵՎԱՆ, 4 մայիսի – Sputnik. ԱԺ շենքի դիմաց կենդանի պատ կազմած ոստիկանները ընդդիմության առաջնորդների հետ բանակցությունների արդյունքում բացեցին ընդդիմության ճանապարհը դեպի Դեմիրճյան փողոց։
Ցուցարարները երթով շարժվեցին այդ ուղղությամբ։
Մինչ այդ «Հայաստան» խմբակցության պատգամավոր Իշխան Սաղաթելյանը բանակցում էր ոստիկանների հետ, որպեսզի փողոցը բացեն, սակայն ոստիկանները հրաժարվում էին դա անել։
Ավելի վաղ հայտնել էինք, որ իշխանությունը մեծ թվով ոստիկանական ուժեր էր կուտակել ԱԺ-ի գլխավոր ու ծառայողական բոլոր մուտքերի մոտ` Բաղրամյան պողոտայի ու Դեմիրճյան փողոցների կողմից։
Վահաններով ու մահակներով զինված ոստիկանները մի քանի շարքով պատ էին կազմել Ազգային ժողովի մուտքերի մոտ։
Ոստիկանությունն ապահովում էր ՀՀ կառավարության անդամների ու վարչապետ Նիկոլ Փաշինյանի անվտանգությունը, որոնք ԱԺ էին եկել պատգամավորների հետ հարցուպատասխանին մասնակցելու համար։
Հիշեցնենք` Հայաստանում բողոքի նոր ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 3-ին փակվեցին նաև միջմարզային մի քանի ճանապարհներ։
Մայիսի 4-ի առավոտյան անհնազանդության ակցիաները վերսկսվեցին։
Լրահոս
0