Фон для радио  - Sputnik Արմենիա, 1920
ՌԱԴԻՈ

Ինչո՞ւ է Թուրքիան կրկին ցանկանում Սիրիայում գործողություն սկսել. թուրքագետի տեսակետը

Ի՞նչ խնդիր է Թուրքիան մտադիր լուծել Սիրիայում նոր ռազմական գործողությամբ
Բաժանորդագրվեք
Yandex newsTelegram
ՀՀ ԳԱԱ Արևելագիտության ինստիտուտի գիտական ղեկավարի պաշտոնակատար, ակադեմիկոս, թուրքագետ Ռուբեն Սաֆրաստյանը Sputnik Արմենիայի եթերում մեկնաբանել է Թուրքիայի՝ Սիրիայում նոր ռազմական գործողություն սկսելու մտադրությունը։
Թուրքիան այժմ գաղտնի բանակցությունների մեջ է Սիրիայում գործողության համար, առաջին հերթին տեղի ռուսական զինվորական ղեկավարության հետ։ Այսպիսի կարծիք Sputnik Արմենիայի եթերում հայտնեց թուրքագետ Ռուբեն Սաֆրաստյանը՝ նշելով, որ համոզված չէ, թե Թուրքիան առաջիկա օրերին կսկսի այդ գործողությունը։
«Մինչ Անկարան հայտարարում է, որ այսօր-վաղը սկսելու է այդ գործողությունը, իրականում փորձում է իր քայլերը համապատասխանեցնել ուրիշների հետ, դրա համար, կարծում եմ, որ հիմա դեռ բանակցում են»,- նշեց Սաֆրաստյանը։
Ավելին՝ թուրքագետը նշեց, որ այս գործողությունը Թուրքիան դեռ կես տարի առաջ էր ցանկանում իրականացնել, սակայն այն կանխվեց Ռուսաստանի կողմից։ Նրա խոսքով՝ կրկին բանակցություններ ընթացան, և վերջին պահին ռուսական կողմին հաջողվեց կանխել գործողությունը։ Հիմա, ըստ Սաֆրաստյանի, իրավիճակն այլ է, Թուրքիան օգտվում է նրանից, որ Ռուսաստանը զբաղված է Ուկրաինայում։
Թուրքագետի կարծիքով՝ Սիրիայում թուրքական գործողությունը երկու նպատակ է հետապնդում, որից մեկը իրենց հայտարարած, այսպես կոչված, «անվտանգության գոտի» ստեղծելն է, մյուսը՝ սիրիացի փախստականների հարցը լուծելը, որը թուրք բնակչության մոտ մեծ դժգոհություն է առաջացրել։
«Գործողությունն Էրդողանի կողմից ներկայացվում է որպես փախստականների խնդրի լուծման մի ձև, ասում են՝ դրա շնորհիվ հնարավոր կլինի 1 մլն-ից ավելի փախստականի տեղափոխել Սիրիայի գրավյալ տարածքներ»,-ասաց Սաֆրաստյանը։
Պաշտոնական տվյալներով այժմ Թուրքիայում մոտ 5 մլն սիրիացի փախստական կա, ոչ պաշտոնականով՝ 8 մլն։ Թուրքիայի որոշ նահանգներում, Սաֆրաստյանի տվյալներով, արդեն փախստականները կազմում են բնակչության մեծամասնությունը, ու քանի որ դրա պատճառով կարող է տուժել Էրդողանի վարկանիշը, ուզում են խնդիրը լուծել։
Անդրադառնալով այն հանգամանքին, որ տարբեր երկրներ, այդ թվում՝ Ռուսաստանը, ԱՄՆ-ն, Իրանը և այլն, դեմ են արտահայտվել թուրքական նոր գործողությանը, Սաֆրաստյանը նշեց՝ այդպիսի հայտարարությունները ժամանակակից Թուրքիային չեն կանգնեցնի։
«Ժամանակակից Թուրքիայի քաղաքականության առանձնահատկությունն այն է, որ նման հայտարարությունները հիմնականում չեն ազդում Թուրքիայի վրա, կոնկրետ ուժն է, եթե ուժը կլինի, դա կկանգնեցնի նրանց»,- բացատրեց թուրքագետը։
Հիշեցնենք, որ Թուրքիան վերջին շրջանում պաշտոնական տարբեր, այդ թվում՝ Էրդողանի մակարդակով հայտարարվում է, որ Անկարան մտադիր է նոր ռազմական գործողություն իրականացնել Սիրիայի հյուսիսում՝ «իր հարավային սահմանների անվտանգությունն ապահովելու համար»։
Լրահոս
0