Անդրանիկ Թևանյանը մանդատը վայր դնելու դիմում է ներկայացրել Ազգային ժողով
18:27 10.08.2023 (Թարմացված է: 18:43 10.08.2023)
Անդրանիկ Թևանյան
© Sputnik / Aram Nersesyan
Բաժանորդագրվել
Պատգամավորը պատրաստվում է մասնակցել Երևանի ավագանու ընտրություններին՝ գլխավորելով «Մայր Հայաստան» դաշինքը։
ԵՐԵՎԱՆ, 10 օգոստոսի – Sputnik. «Հայաստան» խմբակցության պատգամավոր Անդրանիկ Թևանյանն այսօր հրաժարականի դիմում է ներկայացրել ՀՀ Ազգային ժողով։ Տեղեկությունը հայտնում է խորհրդարանի մամուլի ծառայությունը։
Նշվում է, որ եթե հրաժարականի հրապարակումից հետո մեկ շաբաթվա ընթացքում պատգամավորը գրավոր դիմումով հետ վերցնի հրաժարականի մասին իր դիմումը, ապա Ազգային ժողովի նախագահն այդ մասին հանդես կգա հայտարարությամբ։
«Եթե հետ չվերցնի հրաժարականի մասին իր դիմումը, ապա նրա լիազորությունների դադարեցման մասին կկազմվի արձանագրություն, որը Ազգային ժողովի նախագահը կստորագրի և կհրապարակի»,– ասված է հայտարարությունում։
Նշենք, որ երեկ հայտնի դարձավ, որ Թևանյանը մասնակցելու է Երևանի ավագանու ընտրություններին՝ գլխավորելով «Մայր Հայաստան» դաշինքը։ Դաշինքի մասնակից ուժերն են «Երկիր Ծիրանի» կուսակցությունը՝ Զարուհի Փոստանջյանի գլխավորությամբ, և «Ինտելեկտուալ Հայաստան» կուսակցությունը` Մանուկ Սուքիասյանի գլխավորությամբ։ Ցուցակը գլխավորելու է շարժման համակարգող Անդրանիկ Թևանյանը։
Հիշեցնենք` Երևանի ավագանու ընտրությունները տեղի կունենան սեպտեմբերի 17-ին:
Այս պահի դրությամբ Երևանի ավագանու ընտրություններին մասնակցելու և քաղաքապետի պաշտոնին հավակնելու մասին հայտարարել են հետևյալ անձինք ու քաղաքական ուժերը.
Նախկին փոխվարչապետ, այժմ Երևանի փոխքաղաքապետ Տիգրան Ավինյան (իշխող «Քաղաքացիական պայմանագիր» կուսակցություն),
Երևանի ավագանու «Լույս» խմբակցության ղեկավար Դավիթ Խաժակյան,
Երևանի Կենտրոն վարչական շրջանի նախկին ղեկավար Վիկտոր Մնացականյան,
«Ապրելու երկիր» կուսակցության նախագահ Մանե Թանդիլյան,
«Ազգային առաջընթաց» կուսակցության վարչության անդամ, Երևանի նախկին քաղաքապետ Հայկ Մարության,
ՀՀ արդարադատության նախկին նախարար, «Հանրապետություն» կուսակցության քաղխորհրդի անդամ Արտակ Զեյնալյան,
«Հանուն սոցիալական արդարության» կուսակցություն (ՀԱՍԱԿ),
Տիգրան Արզաքանցյանի «Ուժը Հայրենյաց» կուսակցություն (ցուցակը գլխավորում է Նելլի Հարությունյանը),
«Մայր Հայաստան» շարժման համակարգող Անդրանիկ Թևանյան,
«Ժողովրդավարական համախմբում» կուսակցություն։
