Կոալիցիա կազմելու վերաբերյալ քննարկում չի եղել. Մարությանը վստահ է` 50+% ձայն կունենան
15:55 17.09.2023 (Թարմացված է: 15:56 17.09.2023)
Հայկ Մարության
© Andranik Ghazaryan
Բաժանորդագրվել
Հայկ Մարությանը նշեց, որ ինքը քվեարկել է, որպեսզի կարողանա հետ բերել երևանցու հույսը, որը ներկայիս իշխանությունները գողացել են ժողովրդից։
ԵՐԵՎԱՆ, 17 սեպտեմբերի – Sputnik. Երևանի քաղաքապետի թեկնածու Հայկ Մարությանը ավագանու ընտրություններում հաղթանակի հավանականությունը բարձր է գնահատում, այդ պատճառով էլ որևէ ուժի հետ կոալիցիա կազմելու վերաբերյալ քննարկում չի եղել։ Մարությանն այդ մասին ասաց Երևանի ավագանու ընտրություններում քվեարկելուց հետո։
«Մենք վստահ ենք, որ 50+ տոկոս ձայն ենք ունենալու, այդ պատճառով այս մասով որևէ քննարկում չենք ունեցել։ Ընդամենը մի քանի ժամ է մնացել, կսպասենք, արդյունքներից հետո անհրաժեշտության դեպքում քննարկումներ կսկսենք։ Ընտրություններում հաղթանակի հավանականությունը բարձր եմ գնահատում»,– ասաց նա։
Մարությանը շեշտեց` քվեարկել է, որպեսզի կարողանա հետ բերել երևանցու հույսը, քանի որ ներկայիս իշխանությունները գողացել են ժողովրդի հույսը։ Երևանի քաղաքապետի թեկնածուն ընդգծեց` դեռ օրն առջևում է, բայց հորդորեց քաղաքացիներին ավելի ակտիվ մասնակցել ու գնալ քվեարկելու։
Հիշեցնենք` Երևանում այսօր ավագանու ընտրություններ են անցկացվում, որին մասնակցում են 13 կուսակցություն և 1 դաշինք.
«Հայաստանի եվրոպական» կուսակցություն (թեկնածուն` Տիգրան Խզմալյան),
«Ժողովրդավարական համախմբում» կուսակցություն (Սուրեն Պետրոսյան),
«Քաղաքացիական պայմանագիր» կուսակցություն (Տիգրան Ավինյան),
«Հանուն սոցիալական արդարության» կուսակցություն (Արման Ղուկասյան),
«Ուժը հայրենյաց» կուսակցություն (Նելլի Հարությունյան),
«Հանրային ձայն» կուսակցություն (Արտակ Գալստյան),
«Ազգային առաջընթաց» կուսակցություն (Հայկ Մարության),
«Հաղթանակ» կուսակցություն (Վիկտոր Մնացականյան),
«Ապրելու երկիր» կուսակցություն (Մանե Թանդիլյան),
«Հանրապետություն» կուսակցություն (Արտակ Զեյնալյան),
«Միացյալ Հայաստան» կուսակցություն (Երվանդ Թարվերդյան),
«Արդար Հայաստան» կուսակցություն (Նորիկ Նորիկյան),
«Լուսավոր Հայաստան» կուսակցություն (Դավիթ Խաժակյան),
«Մայր Հայաստան» դաշինք («Երկիր Ծիրանի» և «Ինտելեկտուալ Հայաստան կուսակցություններ) (Անդրանիկ Թևանյան)։
Նշենք, որ ժամը 08։00–ին Երևանի 12 վարչական շրջաններում բացվել են 475 ընտրական տեղամասերի դռները։
Երևանի քաղաքի գրանցում ունեցող քաղաքացիները կարող են մինչև երեկոյան 20։00–ն մասնակցել ավագանու ընտրություններին և իրենց քվեն տալ նախընտրած ուժին։
Սեպտեմբերի 7-ի դրությամբ Երևանում ընտրողների թիվը կազմում է 824 հազար 250։ Ըստ վարչական շրջանների` ամենաշատ ընտրողները Շենգավիթ համայնքում են` 110780, իսկ ամենաքիչը Նուբարաշենում` 8065։
