ԼՂ–ից բռնի տեղահանվածներից ոմանք 50 հազարական դրամ աջակցությունից չեն օգտվի
11:36 09.11.2023 (Թարմացված է: 11:37 09.11.2023)
Բռնի տեղահանվածները Գորիսում. Արխիվային լուսանկար
© Sputnik
Բաժանորդագրվել
Նոյեմբեր և դեկտեմբեր ամիսների վճարումներն իրականացնելու համար ՀՀ պահուստային ֆոնդից կհաստակեցվի 10 մլրդ դրամ։
ԵՐԵՎԱՆ, 9 նոյեմբերի — Sputnik. Լեռնային Ղարաբաղից բռնի տեղահանվածներից ՀՀ–ում հյուրանոցներում ու հյուրատներում ժամանակավոր բնակություն հաստատած անձինք, ՀՀ բանկային հաշվին 2 մլն դրամից ավելի գումար ունեցողները չեն օգտվի 50 հազար դրամ աջակցությունից։ Այս մասին կառավարության այսօրվա նիստին հայտարարեց ՀՀ աշխատանքի և սոցիալական հարցերի նախարար Նարեկ Մկրտչյանը։
«Այս դեպքում խոսքը ոչ թե ընտանիքի անդամների, այլ այն անձանց մասին է, որոնք ունեն այդ դրամական միջոցները։ Ծրագրից չեն կարող օգտվի նաև մինչև տեղահանումը ՀՀ–ում գտնվող անձինք։ Նշենք, որ երկամսյա սոցիալական աջակցության միջոցառումների այս ծրագիրն առաջնային սպառողական ծախսերը հոգալու համար է, որի շահառու կհանդիսանան 100 հազարական դրամ ստացած անձինք` որոշ բացառություններով»,– նշեց նախարարը։
Ըստ նրա` բացառություն կկազմեն նաև Զինվորական ապահովագրության հիմնադրամից աջակցություն ստացող անձինք։
Նախարարը հիշեցրեց, որ ՀՀ կառավարությունը ԼՂ–ից բռնի տեղահանված անձանց հաջորդ շաբաթ կսկսի վճարել 50 հազար դրամ աջակցությունը` նոյեմբեր և դեկտեմբեր ամիսների համար։
Մկրտչյանը նշեց, որ այս ծրագրի շահառուները դիմում գրելիս իրենց համաձայնությունը կտան, որպեսզի ՀՀ կենտրոնական բանկը իրենց բանկային հաշիվների համալիր ստուգում իրականացնի` պարզելու գումարային մնացորդը։
Դիմումները կլինեն էլեկտրոնային տարբերակով, և ՀՀ աշխատանքի և սոցիալական հարցերի նախարարությունը դրանք կսկսի ընդունել արդեն հաջորդ շաբաթվանից սկսած։ Մկրտչյանը ևս մեկ անգամ ընդգծեց, որ վճարումներն իրականացվելու են անկանխիկ եղանակով։
Նոյեմբեր և դեկտեմբեր ամիսների վճարումներն իրականացնելու համար ՀՀ պահուստային ֆոնդից կհատկացվի 10 մլրդ դրամ։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։
