ԼՂ–ից բռնի տեղահանվածներից շուրջ 1000–ը դեռ չեն օգտվել 100 000 դրամ միանվագ աջակցությունից
13:14 10.01.2024 (Թարմացված է: 13:33 10.01.2024)
Արցախից բռնի տեղահանվածներ. արխիվային լուսանկար
© Sputnik / Aram Nersesyan
Բաժանորդագրվել
Այն տեղահանվածները, որոնք չեն օգտվել 100 000 դրամ աջակցության ծրագրից, մեխանիկորեն չեն օգտվում նաև 40 +10 հազար ծրագրից։
ԵՐԵՎԱՆ, 10 հունվարի – Sputnik. Լեռնային Ղարաբաղից բռնի տեղահանված շուրջ 1000 քաղաքացի դեռ չեն օգտվել պետության կողմից տրամադրվող 100 000 դրամ միանվագ աջակցությունից։ 2023 թվականն ամփոփող ասուլիսի ժամանակ տեղեկությունը հայտնեց ՀՀ աշխատանքի և սոցիալական հարցերի նախարար Նարեկ Մկրտչյանը` պատասխանելով Sputnik Արմենիայի հարցին։
«Մենք պետք է վստահ լինենք այդ շահառուների ներկայացված տվյալների արժանահավատությանը, պետք է համադրենք մեր ձեռքի տակ եղած տվյալները, և առաջիկա 2–3 շաբաթվա ընթացքում տվյալների վերջնական ստուգումը կավարտվի, և շահառու հանդիսացող անձանց դրանք կփոխանցվեն»,–ասաց Մկրտչյանը։
Ի դեպ, նրանք, ովքեր դեռ չեն օգտվել 100 000 դրամ աջակցության ծրագրից, մեխանիկորեն չեն օգտվում նաև 40 +10 հազար ծրագրից։
Մկրտչյանի խոսքով` հունվարից հետո պարզ կլինի, թե ովքեր են իրենց իրական շահառուները։
«Այժմ անհրաժեշտություն է առաջացել հերթով անցնել այդ հազարավոր տվյալների վրայով, որպեսզի մենք կարողանանք ճիշտ որոշումներ կայացնել ։ Այն որոշումները, որ կայացրել է ներդրված թվային համակարգը` մեզ չի բավարարել, և մենք հիմա գնացել ենք նոր փոփոխությունների, որպեսզի գնահատենք` արդյոք մեր հայրենակիցներն իսկապես դրա շահառուն էին ու չեն ստացել»,–ասաց Մկրտչյանը։
Նրա խոսքով` 50 000 դրամ աջակցության երկամսյա ծրագրի մասով, որոնք պետք է տրվեին Լեռնային Ղարաբաղից բռնի տեղահանվածներին (նոյեմբեր, դեկտեմբեր ամիսների համար) շատ քիչ դիմելիություն է եղել։
Նշենք, որ ծրագրի շահառու չէին կարող դառնալ հյուրանոցներում կամ հյուրատներում ժամանակավոր բնակվող, ՀՀ-ում չգտնվող և բանկային հաշիվներում 2 միլիոն դրամական շեմից ավելի դրամական միջոց ունեցող անձինք:
«Իրազեկվածություն եղել է, բայց մարդիկ չեն դիմել, որովհետև ֆիլտրեր են աշխատում, և պետք է տեսնեինք` իրենց հաշվեհամարներին 2 մլն դրամ գումարից ավել կա, թե ոչ»,–ասաց նախարարը։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։
