ԵՐԵՎԱՆ, 4 մարտի — Sputnik. Ֆրանսահայ աշխարհահռչակ շանսոնիե Շառլ Ազնավուրն արձագանքել է գյումրեցի անօթևան ընտանիքներին օգնելու և նրանց համար բնակարաններ գնելու դրամահավաքի նախաձեռնությանը:
Շառլ Ազնավուրի ֆեյսբուքյան պաշտոնական էջում հրապարակվել է Հայկ Բարսեղյանի` 13 անօթևան ընտանիքի մասին պատմող տեսանյութը՝ Գյումրու աղետալի երկրաշարժի մասին նկարագրությամբ:
«Սարսափելի երկրաշարժը 25 հազար մարդու կյանք է խլել, հազարավոր ընտանիքներ մնացել են անօթևան և ապրում են առանց հույսի: Սա մի ծրագիր է, որը նպատակ ունի օգնել վտանգավոր պայմաններում ապրող գյումրեցի անօթևաններին»,- գրել է Ազնավուրը:
Ինչպես հաղորդում է news.am-ը, Գյումրու ժուռնալիստների «Ասպարեզ» ակումբի նախագահ Լևոն Բարսեղյանը կայքին հայտնել է, որ Շառլ Ազնավուրը դրամական աջակցություն չի ցուցաբերել, աջակցությունը եղել է դրամահավաքի մասին պատմող հրապարակման վերահրապարակումը:
Նրա խոսքով՝ դրամահավաքի նախաձեռնողները կապ են հաստատել նաև Մադրիդի «Ռեալ» ակումբի հետ: Նախնական համաձայնությամբ՝ թիմի խաղացողներն ուղարկելու են իրենց մարզաշապիկները` ստորագրություններով և գրությամբ. «Ի աջակցություն Գյումրու անօթևանների»: Մարզաշապիկները վաճառքի են հանվելու մարտի 19-ին կայանալիք բարեգործական աճուրդում։
Աճուրդի համար արդեն կա «Բարսելոնա» ակումբի դրոշը՝ Լիոնել Մեսիի, Չավիի, Ինյեստայի ու թիմի 10 աստղերի ստորագրությամբ:
Աշխարհահռչակ ռոք երաժիշտ Սերժ Թանկյանը ևս միացել է Գյումրու անօթևան 13 ընտանիքի համար բնակարան գնելու նպատակով մեկնարկած դրամահավաքին:
Գյումրեցի հռչակավոր ջազ դաշնակահար Տիգրան Համասյանը անօթևաններին աջակցելու նպատակով Գյումրու տնակային ավաններից մեկում փետրվարի 28-ին բարեգործական համերգ ունեցավ:
Գյումրեցի 13 անօթևան ընտանիքի համար կազմակերպված դրամահավաքն ավարտվում է մարտի 20-ին, և եթե մինչ այդ չհավաքվի սահմանված գումարը, ապա մինչ այս կայքին նվիրաբերված գումարը օգտատերերին հետ կվերադարձվի. կայքի պայմաններն են այդպիսին:
«Նվիրատվությունների 80 տոկոսը դրսից է: Արդեն մեկ ընտանիքի բնակարանի գումար հավաքվել է»,- նշել է Հայկ Բարսեղյանը:
