ԵՐԵՎԱՆ, 16 հոկտեմբերի — Sputnik. Հայ վարպետները ArmHiTec ֆորումին ներկայացրին ցամաքային և ավիացիոն կայանման տարբեր հրթիռներ:
Ցուցահանդեսին ներկայացված տարբեր հզորություններ ունեցող չկառավարվող հրթիռներն արտադրվում են Հայաստանում:
Ֆորումին ներկայացված հրթիռի տեսակը 122 մմ ռումբին համարժեք մարտագլխիկ ունի, սակայն հրթիռի հնարավորությունները թույլ են տալիս կրկնակի մեծացնել մարտագլխիկի զանգվածը:
«Դրանք կարելի է տեղադրել ոչ միայն ինքնաթիռների վրա, այլև բաց թողնել երկրից», — ասաց ՊՆ-ի գործարաններից մեկում աշխատող Ռաֆիկ Սողոմոնյանը:
Նա ցույց տվեց մի սթենդ, որտեղ պատկերված էր ավելի խոշոր հրթիռ: Այդ հրթիռի թռիչքի հեռավորությունը մի քանի տասնյակ կիլոմետրի է հասնում: Նրա հզորությունը ավելի բարձր է, մարտական մասը կարող է շուրջ 200 կգ լինել:
Հրթիռի հնարավորություններն ավելի լավ պատկերացնելու համար Սողոմոնյանը հայտնեց, որ այն կարող է վերածվել 25 հազար մահացու բեկորի:
Ցուցահանդեսին ներկայացված են նաև դիպուկահարի զենքի որոշ տեսակներ, որոնք ամբողջությամբ արտադրվում են Հայաստանում: Դրանցից որոշները բանակին են ծառայում, մյուսները սպասում են գծային արտադրության իրենց հերթին:
Զենքի թիրախային հեռավորությունը տարբեր է` 600-1000 մետր: Այս նմուշներն արդեն հետաքրքրել են ցուցահանդեսի օտարերկրյա հյուրերին:
«Հասկանալի չէ միայն, թե այդ հետաքրքրությունն ինչով էր պայմանավորված», — ժպտալով ասաց այդ զենքերն արտադրող «Գառնի-Լեռ» ընկերության աշխատակից Վաչիկ Սաղաթելյանը:
Բացի այդ, ընկերության տաղավարում ներկայացված են АК-74, АКМ, ПК, СВД փողեր և հրազեն: Աշխատակիցների խոսքով՝ ռուսական հրանոթները հայկականով փոխարինելուց հետո կարող են ավելի երկար ծառայել, քան գործարանի արտադրանքը:
Տարվա ընթացքում զրոյից մշակվել է նաև ուսումնական հրաձգության համար նախատեսված РПГ-7 (ПУС-7) նռնականետից մի սարք: Այն ինքնաձիգի համար նախատեսված սովորական փամփուշտներով է կրակում (7,32 մմ).
«Եթե, ասենք, իսկական նռնակի մեկ կրակոցն արժե 100 դոլար, ապա ПУС-7-ով մեկ կրակոցն արժե ընդամենը 3 ցենտ», — ասաց ընկերության մեկ այլ աշխատակից:
Սպառազինության և պաշտպանական տեխնոլոգիաների ArmHiTec-2016 առաջին միջազգային ցուցահանդեսն անցկացվեց Երևանում 2016 թվականի հոկտեմբերի 13-15-ը։ Միջոցառման նպատակն էր լայն զանգվածներին ներկայացնել ժամանակակից բարձր տեխնոլոգիական, նորարարական մշակումները և պատրաստի լուծումները` ԶՈՒ-ի կարիքներն ապահովելու համար։
