ԵՐԵՎԱՆ, 6 մայիսի — Sputnik, Արմենուհի Մխոյան. Ռազմակայանի հրամանատարությունն արդեն երեկվանից սկսել է փոխանցել երկու ամսվա աշխատավարձը, իսկ 3-րդ ամսվա աշխատավարձը խոստացել է փոխանցել մինչև մայիսի 15-ը: Այս մասին Sputnik Արմենիային ասաց ռուսական 102-րդ ռազմակայանի աշխատակիցներից մեկը՝ Թովմասը:
«Եթե դա էլ տան, այլևս խնդիր չենք ունենա»,- ասաց նա:
Թովմասը շնորհակալություն հայտնեց ռազմակայանի հրամանատար Վլադիմիր Յելկանովին:
«Իր խոսքի տերը եղավ: Խոստացավ, որ 3 օրվա ընթացքում կլուծի հարցն ու երկրորդ օրն արդեն լուծեց»,- ասաց աշխատակիցը՝ հավելելով, որ իրենք մինչ այս նման խնդիր չէին ունեցել:
Նրա խոսքով՝ հարցը 3 ամիս շարունակ չի լուծվել, մինչև չի հասել ռազմակայանի հրամանատարին:
«Վստահ եմ, որ նա այս մասին տեղյակ էլ չի եղել»,- ասաց Թովմասը:
Գյումրիում տեղակայված 102-րդ ռազմակայանի աշխատակիցները մի քանի օր առաջ գործադուլ էին հայտարարել, քանի որ ռազմակայանը չէր վճարել նրանց փետրվար, մարտ և ապրիլ ամիսների աշխատավարձը: Նշենք, որ նմանատիպ խնդիր ուներ ռազմակայանի բնակսպասարկման բաժնի մոտ 200 աշխատակից: Սպասարկման բաժնի աշխատակիցների աշխատանքային պայմանագրի ժամկետը, վերջիններիս տեղեկությամբ, լրացել էր 2017-ի փետրվարի մեկին: Նոր պայմանագրերը դեռ չեն կնքվել, բայց աշխատակիցներն այդ առնչությամբ չեն մտահոգվի, եթե աշխատավարձերը ժամանակին վճարվեն:
