ԵՐԵՎԱՆ, 20 փետրվարի — Sputnik. Երևանի ավագանու «կեղտաջրերի պատերազմում» մեղավոր է և՛ իշխանությունը, և՛ ընդդիմությունը։ Այսօր կայացած ասուլիսի ժամանակ լրագրողներին ասաց արդարադատության նախարար Դավիթ Հարությունյանը։
Հիշեցնենք` փետրվարի 13-ին Երևանի ավագանու նիստի ժամանակ ընդդիմադիր «Երկիր ծիրանի» ավագանու խմբակցության անդամները ապակյա տարաներ էին բերել դահլիճ, որոնք բացելուց հետո դահլիճում գարշահոտություն էր տարածվել։ Նրանք հայտարարել էին, որ Նուբարաշենի 4 շենքի բնակիչներն այդ գարշահոտը շնչում են արդեն մի քանի տարի, քանի որ հարևանությամբ գտնվող «Նուբարաշեն» ՔԿՀ-ի կոյուղատարը վնասվել է, իսկ քաղաքային իշխանությունը միջոցներ չի ձեռնարկում այն վերանորոգելու համար։ Արդյունքում «Երկիր ծիրանի» և ՀՀԿ խմբակցությունների անդամների ու քաղաքապետարանի աշխատակիցների միջև ծեծկռտուք էր սկսվել։
Միևնույն ժամանակ նախարարն ավելացրեց, որ պետք չէ հարցին այդքան պրիմիտիվ մոտենալ և կարծել, որ եթե միջամտեր արդարադատության նախարարությունը, միջադեպը տեղի չէր ունենա։
Բանն այն է, որ կեղտաջրերը Երևանի ավագանու ընդդիմադիրները վերցրել էին այն կոյուղու խողովակից, որը դուրս է գալիս քրեակատարողական հիմնարկի շենքից։
«Ես դատապարտում եմ ցանկացած ոչ բարեկիրթ, մեր մշակույթին անհարիր գործողություններ, որոնք, ցավոք սրտի, տվյալ պարագայում տեղի են ունեցել երկու կողմերից», — ասաց Հարությունյանը։
Նա նշեց, որ դեռ անցյալ տարի Արդարադատության նախարարությունը միջոցներ էր հատկացրել Նուբարաշենի ՔԿՀ-ի (Հայաստանում քրեակատարողական հիմնարկները գտնվում են Արդարադատության նախարարության ենթակայության տակ) կոյուղու վերանորոգման նախագծի համար, իսկ աշխատանքները պետք է անցկացվեն 2018 թվականին։