ԵՐԵՎԱՆ, 20 մարտի — Sputnik. Mercedes մակնիշի ավտոբուսը, որը վթարվել էր Երևանից Տվեր մեկնելիս, արտոնագիր ուներ կանոնավոր ուղևորափոխադրումներ կատարելու համար։ Այս մասին Sputnik Արմենիայի թղթակցին հայտնեց ՀՀ տրանսպորտի նախարարի մամուլի քարտուղար Անահիտ Առաքելյանը։
Երևանից Տվեր մեկնող ավտոբուսն այսօր առավոտյան` ժամը 8։40–ի շրջակայքում վթարի է ենթարկվել Պավլովյան շրջանում, Մ-4 «Դոն» միջպետական ավտոճանապարհի 673-րդ կիլոմետրին։ Այն բախվել է Վորոնեժից եկող բեռնատարին։ 8 մարդ վնասվածքներով տեղափոխվել է հիվանդանոց։ Ե՛վ ավտոբուսի, և՛ բեռնատարի վարորդները մահացել են։ Ավտոբուսում 50 ուղևոր է եղել, բոլորը ՀՀ քաղաքացիներ։ Նրանցից 8–ը վիրավորվել են և տեղափոխվել հիվանդանոց։
Ավտոբուսը շահագործում էր «Ման–Տուր» ընկերությունը, որը Երևանից ուղևորափոխադրումներ էր իրականացնում դեպի Մոսկվա և Տվեր։ Ընկերությունն ընտրվել էր մրցութային կարգով և պահպանում էր բոլոր պահանջները. գիծ դուրս գալուց առաջ ավտոբուսը ստուգվել է, իսկ 2 օր քշելու համար ոչ թե մեկ, այլ մեկը մյուսին փոխարինող 2-3 վարորդ է աշխատում։
«Ման–Տուրի» ներկայացուցիչները հեռախոսազանգերին չեն պատասխանում։