ԵՐԵՎԱՆ, 25 հուլիսի — Sputnik. Բնությունը փրկելու ամենաարագ միջոցը էժան էներգիա գտնելն է` ավանդական էներգապաշարների փոխարեն։ Հայտնի բլոգեր Nas Daily-ն այս մասին պատմել է հայաստանյան տաքսիների թեմայով տեսանյութում։
«Հայ տաքսիստները «ծառ գրկողներ չեն» (անգլերեն արտահայտության բառացի թարգմանությունը, այդպես են անվանում մոլի էկոակտիվիստներին`. խմբ)։ Նրանք ուղղակի ցանկանում են խնայել բենզինի փողը», — տեսանյութին կից գրել է բլոգերը։
Նրա խոսքով` սեղմված գազը վերջնական որոշում չէ, բայց դա, անշուշտ, չարյաց փոքրագույնն է։
Նուսեյր Յասինը (Nas Daily-ի իսկական անունը) մի քանի օր Հայաստանում է և արդեն հասցրել է մի քանի հոլովակներ նկարել հանրապետության առանձնահատկությունների մասին։
Ավելի վաղ Nas Daily-ի 1 րոպեանոց տեսահոլովակի հերոսն էր դարձել Երևանի ամենասիրված անվաչմշկորդ Լևոն պապը։
Բլոգերը պատմել էր նաև Հայաստանի դպրոցներում ուսուցանվող շախմատի մասին, և նրա տեսահոլովակում նկարահանվել էին ՀՀ նախագահ Արմեն Սարգսյանն ու գրոսմայստեր Լևոն Արոնյանը։
Nas Daily-ն մեկրոպեանոց տեսահոլովակ է նվիրել նաև Հայաստանի ցայտաղբյուրներին։
