ԵՐԵՎԱՆ, 16 հունվարի — Sputnik. ՀՀ վարչապետ Նիկոլ Փաշինյանը շնորհավորական ուղերձ է հղել Միխայիլ Միշուստինին՝ Ռուսաստանի Դաշնության վարչապետ նշանակվելու կապակցությամբ:
Շնորհավորական ուղերձում վարչապետը հայտնել է, որ ՀՀ կառավարությունը վճռականորեն է տրամադրված Ռուսաստանի Դաշնության նոր կառավարության հետ ակտիվ համագործակցության, երկկողմ և բազմակողմ ձևաչափերով գործընկերության հետագա ամրապնդման ուղղությամբ, այդ թվում՝ Եվրասիական տնտեսական միության շրջանակում ինտեգրման խորացման ուղղությամբ:
«Վստահ եմ, որ համատեղ ջանքերով մենք կկարողանանք հարստացնել հայ-ռուսական դաշնակցային փոխգործակցության օրակարգը և նոր ազդակ հաղորդել մեր բազմակողմ համագործակցությանը՝ հիմնված մեր երկրների ժողովուրդների բազմադարյա բարեկամության վրա»,– ասված է ուղերձում:
Հիշեցնենք` հունվարի 15-ին ՌԴ վարչապետ Դմիտրի Մեդվեդևը Վլադիմիր Պուտինի` Դաշնային ժողովին հղած ուղերձից հետո հայտարարել էր, որ կառավարությունն ամբողջ կազմով հրաժարական է տալիս:
ՌԴ նախագահը շնորհակալություն էր հայտնել Մեդվեդևի կառավարությանը աշխատանքի համար և նախարարների կաբինետին խնդրել պարտականությունները կատարել ամբողջ ծավալով, մինչև նոր կաբինետի ձևավորումը։ ՌԴ նախագահը նաև հայտարարել էր Անվտանգության խորհրդի փոխնախագահի պաշտոն ստեղծելու և այդ պաշտոնը Դմիտրի Մեդվեդևին առաջարկելու մտադրության մասին։
Նույն օրը Պուտինը ՌԴ վարչապետի պաշտոնում առաջադրել էր Դաշնային հարկային ծառայության ղեկավար Միխայիլ Միշուստինի թեկնածությունը:
Պետդուման համաձայնություն տվեց, որ ՌԴ նոր վարչապետ նշանակվի Միշուստինը
Հունվարի 16-ին ՌԴ Պետական դուման 383 կողմ ու ոչ մի դեմ ձայներով հաստատեց Միխայիլ Միշուստինի թեկնածությունը ՌԴ վարչապետի պաշտոնում։
