ԵՐԵՎԱՆ, 11 հունիսի - Sputnik. «Նորք» ինֆեկցիոն կլինիկական հիվանդանոցը Facebook-ի պաշտոնական էջում պարզաբանող հաղորդագրություն է տարածել՝ անդրադառնալով համացանցում աղմուկ բարձրացրած ուղեգրին, որում հիվանդի մեկուսացման հասցեն նշված էր. «Ադրբեջան, Շուշի քաղաք»։
««Արմեդ» ծրագիրը, որի միջոցով է փոխանցվում են պացիենտների մասին տեղեկությունները, սինխրոնիզացված է Google Map համակարգի հետ, և հասցեները ֆիքսվում են նշված ծրագրի միջոցով։ Google map քարտեզ որոնողական-տեղեկատվական ծառայությունը, ցավոք սրտի, Արցախը պաշտոնապես ընդգրկել է Ադրբեջանի կազմում, և այդ տրամաբանությամբ ավտոմատ հասցեն նշվել է նման կերպ»,– նշված է հաղորդագրության մեջ։
Ուղեգրումը ոչ թե «Նորք» ԻԿՀ-ն է արել, այլ տարածքում «Արմեդ» համակարգով աշխատող օպերատորները, որոնք կցված են «Նորք» ԻԿՀ-ին։
Հիվանդանոցից նաև նշում են, որ իրենց առջև դրված այսքան խնդիրների և ծանրաբեռնված աշխատանքի ժամանակ անընդունելի են համարում որոշ շրջանակների կողմից ստեղծվող ինտրիգները և մանիպուլացված ինֆորմացիայի տարածումը։
«Էլեկտրոնային առողջապահության ազգային օպերատոր» ՓԲԸ–ն, որը սպասարկում է էլեկտրոնային առողջապահության «Արմեդ» համակարգը, նույնպես պարզաբանում է տարածել։
««Ֆեյսբուք» սոցիալական ցանցում այսօր հայտնված ուղեգիրը, որտեղ նշված է «Մեկուսացման հասցե՝ Ադրբեջան, Շուշի քաղաք», տեխնիկական սխալի հետևանք է: Այդ բառերը ոչ ոք չի լրացրել ձեռքով, դա պարզապես Յանդեքսի էլեկտրոնային քարտեզի ավտոմատ տվյալն է, որը համակարգը փոխանցում է հենց հայերեն»,– նշված է հաղորդագրության մեջ:
Ընկերությունը հայցում է բոլորի ներողամտությունը նման տեխնիկական թերության համար (որ Յանդեքս map-ի բոլոր հասցեներից չի հեռացվել «Ադրբեջան» բառը):
«Տեղեկացնում ենք, որ արդեն թերությունը շտկված է: Հայտնում ենք նաև, որ սա ոչ պաշտոնական, բացառապես ներքին օգտագործման փաստաթուղթ է՝ նախատեսված միայն վարորդների համար (քաղաքացիներին օդանավակայանից մեկուսացման վայրեր տեղափոխելու համար): Խնդրում ենք ըմբռնումով մոտենալ այդ փաստին և հաշվի առնել, որ համավարակի օրերին ինչպես բժիշկներն են աշխատում օրուգիշեր, այնպես էլ մեր ընկերության ծրագրավորողները: Շատ հաճախ նրանք ստիպված են լինում հրատապ ցուցումով ծրագրային արագ փոփոխություններ կատարել, որոնք առանց պատշաճ թեստավորման (քանի որ դրա ժամանակը երբեմն պարզապես չի լինում) անմիջապես դրվում են կիրառության մեջ: Այդ վրիպակը եղել է նման փոփոխության հետևանք»,– տեղելացնում է ընկերությունը։
Հիշեցնենք՝ «Սասնա ծռեր» համահայկական շարժումն այսօր հրապարակել է մեկուսացման ուղեգրի լուսանկար, որը, ըստ կից գրառման, տրվել է Ռուսաստանից ժամանած արցախաբնակ ՀՀ քաղաքացուն Նորքի ինֆեկցիոն հիվանդանոցում։ Ուղեգրի մեկուսացման հասցեի տողում գրված է. «Ադրբեջան, Շուշի քաղաք»։
«Աղջիկս ամեն օր զանգում, հարցնում է` ինչու տուն չես գալիս». «Նորք» ինֆեկցիոնի տնօրեն
ՀՀ առողջապահության նախարար Արսեն Թորոսյանի խորհրդական Աշոտ Սարգսյանը Facebook-ում պարզաբանել էր մեկուսացման ուղեգրում տեղ գտած սխալը` նշելով, որ համակարգը ավտոմատացված է գտնում վայրը քարտեզի վրա։ Դա քարտեզների խնդիրն է, Google-ը պիտի ուղղի դա, սակայն նրանք չեն անում։
Առողջապահության նախարարի խոսնակ Ալինա Նիկողոսյանն էլ Facebook–ում գրել էր, որ փաստաթղթում նշվածը տեխնիկական վրիպակ է եղել։
«Սիրելի՛ քաղաքացիներ, օգնեք մեզ, խնդրում եմ». «Նորք» ինֆեկցիոն հիվանդանոցի տնօրեն
