ԵՏՄ–ին անդամակցելը թույլ կտա Հայաստանին համարժեք արձագանքել համաշխարհային տնտեսության մարտահրավերներին. Մանասերյան

ԵՐԵՎԱՆ, 10 հունիսի. Sputnik. ԵՏՄ–ին անդամակցելը թույլ կտա Հայաստանին համարժեք արձագանքել համաշխարհային տնտեսության ակտուալ մարտահրավերներին, ուրբաթ ասաց տնտեսական գիտությունների դոկտոր, «Այլընտրանք» հետազոտական կենտրոնի ղեկավար Թաթուլ Մանասերյանը։

«ԵՏՄ–ին անդամակցելը ժամանակի պահանջն է և ճանապարհ, որը թույլ է տալիս համարժեք արձագանքել համաշխարհային տնտեսության ժամանակակից մարտահրավերներին։ Կառույցի ներսում ճիշտ և արդյունավետ կազմակերպման դեպքում Մաքսային միությունը կարող է դառնալ հետխորհրդային տարածքում ռեգիոնալացման գործընթացի կարևոր դրսևորում` ի հակակշիռ տնտեսական և քաղաքական գլոբալիզացման», – ասաց Մանասերյանը «Հայաստան, Եվրասիական ինտեգրում և գլոբալ մարտահրավերներ» թեմայով կլոր սեղանի ժամանակ։

Նրա խոսքերով` զարգացման`գիտականորեն հիմնավորված ծրագրերի և գործուն կառույցների ձևավորման կշռադատված որոշումների դեպքում Մաքսային միությունը կարող է վերածվել համաշխարհային տնտեսության ուժի նոր կենտրոնի։

Երիտասարդ միջազգայնագետների, տնտեսագետների և քաղաքագետների համար նախատեսված «Հայաստան, Եվրասիական ինտեգրում և գլոբալ մարտահրավերներ» թեմայով կլոր սեղանը կազմակերպվել է Եվրասիական փորձագիտական ակումբի և «Նորավանք» գիտակրթական հիմնադրամի նախաձեռնությամբ։

Ղազախստանը, Ռուսաստանն ու Բելառուսը 2014 թ.–ի մայիսի 29–ին Աստանայում ստորագրեցին ԵՏՄ պայմանագիրը, որն ուժի մեջ մտավ 2015 թ.–ի հունվարի 1–ին։ Հունվարի 2–ից ԵՏՄ–ին անդամակցեց Հայաստանը, մայիսին` Ղրղըզստանը։