ԵՐԵՎԱՆ, 8 դեկտեմբերի — Sputnik. «Նաիրիտի» սնանկացումը ոչ թե կփրկի գործարանը, այլ վերաջնականապես կկործանի: Ի պատասխան կառավարության ղեկավար-նախարարի երեկվա հայտարարության, հայտարարում են համակարգող խմբի անդամներն ու պոտենցյալ ներդրողները:
«Սնանկության գործընացը «Նաիրիտը» թաղելու գործընթաց էր: Մենք չենք հավատում, որ սնանկացումից հետո «Նաիրիտը» կառողջանա»,- լրագրողների հետ ուղիղ տեսակապի ժամանակ հայտարարեց Սլովակիայում գրանցված «EU-ASIA Business Finance Centre» հոլդինգի նախագահ Աշոտ Գրիգորյանը, որը պատրաստակամություն է հայտնել ներդրումներ կատարել ու վերագործարկել գործարանը:
Աշոտ Գրիգորյանը հայտարարում է, որ պատրաստ է 20 մլն եվրո ներդրում կատարել՝ գործարանի ացետիլենային հոսքագիծն արդիականացնելու և վերագործարկելու համար: Ավելի ուշ ևս 100-150 մլն եվրոյով կվերագործարկվի բութադիենային արտադրամասը:
Գործարանի վերազինման ու արդիականացման աշխատանքները կատարելու համար Աշոտ Գրիգորյանի ղեկավարած հոլդինգն արդեն իսկ պայմանավորվածություն ունի այդ բնագավառում փորձառություն ունեցող բուլղարական ХЕМ-АД ընկերության հետ, որի ղեկավարներն այսօր ևս մասնակցում էին տեսակապին և հաստատեցին, որ պատրաստ են, ՀՀ կառավարության համաձայնությունն ստանալուց հետո, սկսել աշխատանքները:
Ներդրումային ծրագիրն Աշոտ Գրիգորյանը 2 ամիս առաջ է ներկայացրել ՀՀ կառավարությանը, բայց որևէ պատասխան չի ստացել:
«Ստացել ենք բանավոր պատասխան, որ տենդերն անցկացնելու է ոչ թե էներգետիկայի նախարարությունը, այլ տնտեսական զագացման և ներդրումների նախարարությունը: Բայց այս նախարարությունն էլ մեզ ասում է, թե՝ գիտեք, մենք չենք կարող մրցույթն անցկացնել, քանի որ դրա մասնագիտական ապահովումը կարող է անել միայն էներգետիկայի նախարարությունը»,- ասաց Աշոտ Գրիգորյանը՝ հավելելով, որ հաջորդ շաբաթ պատրաստվում են մրցույթի մասնակցության հայտը ուղարկել կառավարություն և պարզել, թե ի վերջո ո՞ր նախարարությունն այն կընդունի:
«Այս խաղերը մինչև ընտրությունները «Նաիրիտի» հարցը ձգձգելու համար են, հետո եթե կընտրվեն, կխափանեն, եթե իշխանափոխություն լինի «Նաիրիտը» կաշխատի»- կարծում է Աշոտ Գրիգորյանը:
Իսկ կառավարության այն հայտարարություններին թե «Նաիրիտը» միշտ վնասով է աշխատել, գործարանի նախկին տնօրենը հռետորական հարցով է արձագանքում.«Տիգրան Սարգսյանն իր եղբորը նշանակել էր փոխտնօրեն, ինքներդ մտածեք, հնարավո՞ր է վարչապետը իր եղբորը տնօրեն նշանակեր մի գործարանում, որը վնասով էր աշխատելու:
«Գործարանն աշխատել է պլյուսով, թալանել են գործարանը, այնուհետև վարկեր են վեցրել և դրանք էլ թալանել»,- ասաց նախկին տնօրենն ու հավելեց, որ վնասով աշխատող գործարանի նոր տերերն իրենց հարազատներին ընդունել են ղեկավար աշխատանքի ու աստղաբաշխական աշխատավարձեր վճարել նրանց:
Աշոտ Գրիգորյանը համոզված է՝ գործարանը միտումնավոր է տարվել սնանկացման` տեղի ունեցած թալանը կոծկելու համար:
Ի դեպ, հունվարի առաջին կեսին նախատեսվում է Սլովակիայի էկոնոմիկայի նախարարի և «Նաիրիտում» ներդրումներ կատարել ցանկացող գործարարների այցը Հայաստան: Իսկ հունվարի 20-ին նախանշված է «Նաիրիտի» վերագործարկման մրցույթը:
