ԵՐԵՎԱՆ, 27 նոյեմբերի — Sputnik. Գյումրու սելեկցիոն կայանը ցորենի և գարու սերմացու աճեցնելու նոր նախագիծ է սկսել։ Կայանի սերմնաբուծության բաժնի վարիչ Ռիմա Մուրադյանը Sputnik Արմենիայի թղթակցին հայտնեց, որ այս տարի 1000 քառակուսի մետր նոր տարածք է տրամադրվել կայանին։ Գարնանն այստեղ գարի, ձավարեղեն և կերային խոտեր են ցանել, իսկ աշնանը` ցորեն։
«Ինչպես հայտնի է, սերմացուն նախքան օգտագործելը երեք տարի աճեցնում են։ Այնպես որ երկու տարի անց մենք տասնյակ և հարյուրավոր հեկտարների համար սերմացու կունենանք», – հավելեց նա։
Այսպիսով, շուկայում կավելանան տեղական արտադրության սերմացուները, ընդ որում` ստուգված որակով։
«Հայաստանի տարբեր մարզերի, ինչպես նաև Արցախի գյուղացիները պահանջարկ են ներկայացրել։ Մեր խնդիրն է ստեղծել սերմացուներ, որոնք պիտանի են տարբեր շրջանների համար` և՛ հարթավայրային, և՛ լեռնային», – նշեց նա։
Սելեկցիոներներն աշխատում են այդ տեսակներում բարձրացնել սնձանի (գլյուտեն) պարունակությունը, որն անհրաժեշտ է հացի և այլ մթերքների համար։
«Մեր ցորենը ոչ միայն որպես անասնակեր է պիտանի, այլ նաև որպես պարենամթերք, որովհետև գլյուտենի պարունակությունը դրա մեջ 30 տոկոսից ցածր չէ, իսկ սպիտակուցներինը` առնվազն 14-15 տոկոս», – հավելեց Մուրադյանը։
Ե՞րբ բյուջեում փող կլինի. Դարբնիկ գյուղում Փաշինյանից նամակ են ստացել ու հուսահատվել
Բացի դրանից, սելեկցիոներներն աշխատում են գարեջրի համար նախատեսված գարու տեսակների վրա, քանի որ Հայաստանի գարեջրագործարաններից մեկն ուզում է վերսկսել ածիկի արտադրությունը, որը գոյություն է ունեցել խորհրդային տարիներին։
Դրա համար Գյումրիում կաճեցնեն գարու տեսակներ, որոնցում սպիտակուցներն ավելի քիչ կլինեն, իսկ շաքարը` ավելի շատ։
Նշենք, որ 10 տարի առաջ տեղի սերմնաբուծության զարգացման համար Կրասնոդարի երկրամասից հացահատիկների սերմացուներ են բերվել Գյումրու սելեկցիոն կայան։ Դրանք հաջողությամբ ընտելացել են Հայաստանի կլիմային։
Ավտոբուսները կհասնեն մինչև Հայաստանի ամենահեռավոր գյուղեր. նախարար
