ԵՐԵՎԱՆ, 1 դեկտեմբերի — Sputnik. ԵԱՀԿ Մինսկի խումբը միջազգային միության մանդատ ունեցող միակ կառույցն է, որի առաքելությունն է Ղարաբաղյան հակամարտության կողմերին աջակցել խնդիրը քաղաքական-դիվանագիտական միջոցներով կարգավորելու հարցում։ Այս մասին նշված է Հավաքական անվտանգության պայմանագրի կազմակերպության անդամ-երկրների համատեղ հայտարարության մեջ, որը հրապարակվել է կազմակերպության կայքում։
«ԼՂ հիմնախնդրի կարգավորման հարցում ԵԱՀԿ Մինսկի խմբի համանախագահող երկրների միջնորդական ջանքերին աջակցելու» վերաբերյալ հայտարարությունը, որում ՀԱՊԿ անդամ երկրների նախագահները ևս մեկ անգամ վերահաստատել են իրենց աջակցությունը ՄԽ համանախագահողների գործունեությանը, ինչպես նաև հիմնահարցի կարգավորման հայտնի երեք` ազգերի ինքնորոշման իրավունքի, ուժի և ուժի սպառնալիքի չկիրառման և տարածքային ամբողջականության սկզբունքներին:
Հավաքական անվտանգության պայմանագրի կազմակերպության (ՀԱՊԿ) հավաքական անվտանգության խորհրդի նստաշրջանն անցկացվել է նոյեմբերի 30-ին Մինսկում։
Հավաքական անվտանգության պայմանագրի կազմակերպությունը (ՀԱՊԿ) ստեղծվել է 2002թ.-ին, այժմ կազմակերպության կազմում վեց պետություն է ընդգրկված`Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։ ՀՀ-ն ՀԱՊԿ-ի պայմանագիրը ստորագրել է 1992 թվականի մայիսի 15-ին։ Հայաստանը ՀԱՊԿ-ում նախագահում է 2015 թվականի սեպտեմբերից:
