ԵՐԵՎԱՆ, 7 հուլիսի — Sputnik. Հայաստանի նախագահը հրամանագրեր է ստորագրել Հայաստանի Հանրապետության պաշտպանության համակարգի վեց պաշտոնյաների նշանակելու վերաբերյալ, հայտնում են ՀՀ նախագահի մամուլի ծառայությունից։
ՀՀ նախագահի հրամանագրով Գնդապետ Դավիթ Մանուկյանը նշանակվել է Հայաստանի Հանրապետության պաշտպանության նախարարության երկրորդ բանակային կորպուսի հրամանատար։
Իսկ երկրորդ բանակային կորպուսի հրամանատարի պաշտոնից ազատվել է գեներալ-մայոր Պողոս Պողոսյանը` նշանակվելով ՀՀ ԶՈՒ սպառազինության պետ-վարչության պետ։ Այս պաշտոնում մինչ այդ նշանակված էր գեներալ-մայոր Մելսիկ Չիլինգարյանը, ով պաշտոնանկ է արվել և մեղադրվում է պաշտոնեական դիրքը չարաշահելու մեջ։
Գնդապետ Վալերիկ Քոչարյանը նախագահի հրամանագրով նշանակվել է ՀՀ ՊՆ չորրորդ բանակային կորպուսի հրամանատար։
Չորրորդ բանակային կորպուսի հրամանատարի պաշտոնից ազատվել է գեներալ-մայոր Անդրանիկ Մակարյանը` նշանակվելով Զորքերի (ուժերի) միացյալ խմբավորման հրամանատար։
Գնդապետ Գրիգորի Խաչատուրովը նշանակվել է ՀՀ ՊՆ երրորդ բանակային կորպուսի հրամանատար` կնքելով պայմանագիր հինգ տարի ժամկետով։ Այդ պաշտոնում նա փոխարինել է գեներալ-մայոր Օնիկ Գասպարյանին, ով նշանակվել է ՀՀ ԶՈՒ գլխավոր շտաբի պետի տեղակալ։
