ԵՐԵՎԱՆ, 1 ապրիլի- Sputnik. ️Արցախի Հանրապետության քաղաքացիները կարող են ՀՀ-ից Արցախ վերադառնալ մինչև ապրիլի 3-ը։ Տեղեկությունը հրապարակել է Արցախի տեղեկատվական շտաբը՝ հաշվի առնելով ՀՀ-ում հայտարարված արտակարգ դրությունն ու քաղաքացիների տեղաշարժի մասին սահմանափակումները։
«Հաշվի առնելով ՀՀ Պարետի 2020 թվականի մարտի 31-ի N 27 որոշմամբ սահմանված՝ ՀՀ ողջ տարածքում անձանց ազատ տեղաշարժվելու իրավունքի ժամանակավոր սահմանափակումները (կապված նոր կորոնավիրուսային վարակի հնարավոր տարածման վտանգի հետ)՝ տեղեկացնում ենք, որ Արցախի Հանրապետության քաղաքացիները կարող են Արցախ վերադառնալ մինչև 2020 թվականի ապրիլի 2-ի ժամը 23.59-ի ժամանակահատվածը»,- նշված է հաղորդագրության մեջ։
Նշված ժամկետից հետո ՀՀ ոստիկանությունը կսահմանափակի անձանց տեղաշարժը։
Հավելենք, որ այս սահմանափակումները չեն վերաբերում բեռնափոխադրումներին։ Ավելի վաղ հայտնել էինք, որ սահմանափակումները չեն տարածվի բեռնատարարների և մարդատար մեքենաների վրա՝ բեռնված լինելու դեպքում, ինչպես նաև Պաշտպանության բանակի համար մատակարարում իրականացնող բոլոր կազմակերպությունների վրա։
Փաշինյան. «Ստիպված ենք առնվազն 10 օրով երկարացնել խստացված սահմանափակումները»
Արտակարգ դրության ընթացքում գործատուի կողմից տեղեկանք և անձը հաստատող փաստաթուղթ ներկայացնելու դեպքում քաղաքացիները ՀՀ տարածքում (ինչպես նաև սահմանային հսկիչ կետերով) կարող են տեղաշարժվել նաև ապրիլի 2-ից հետո:
Հիշեցնենք՝ Հայաստանում արտակարգ դրություն է հայտարարված մարտի 16-ից ապրիլի 14-ը։ Պարետ Տիգրան Ավինյանի որոշմամբ՝ մարտի 25-ից ապրիլի 12-ը լրացուցիչ սահմանափակվել է քաղաքացիների ազատ տեղաշարժը։
