ԵՐԵՎԱՆ, 7 հոկտեմբերի – Sputnik. ՀՀ փոխվարչապետ Տիգրան Ավինյանը Facebook-ի էջում իր խիստ մտահոգությունն է հայտնել վերջին օրերին գրանցված կորոնավիրուսով վարակվածների թվի շեշտակի աճով: Նա նշել է, որ եթե այս միտումը շարունակվի, ապա լրջագույն խնդիրներ կստեղծվեն առողջապահական համակարգի համար:
«Արդյունքում, ունենալու ենք թե՛ մարտական գործողությունների ժամանակ վիրավորվածների, թե՛ կորոնավիրուսով վարակված բազմաթիվ հայրենակիցների բժշկական սպասարկման կարիք, ինչը կարող է հանգեցնել առողջապահական համակարգի ռեսուրսների գերլարման»,–նշել է փոխվարչապետը:
Նա հիշեցրել է, որ մեր բժիշկներն արդեն քանի ամիս է աշխատում են 24/7 ռեժիմով՝ գերնպատակ ունենալով լավագույնս սպասարկել յուրաքանչյուր պացիենտի։ Հետևաբար, նրա խոսքով, եթե ցանկանում ենք, որ մարտական գործողությունների արդյունքում վիրավորված զինվորներն ու քաղաքացիները ստանան լավագույն բուժսպասարկում,կորոնավիրուսով վարակված պացիենտները ստանան պատշաճ ծառայություն, իսկ տնտեսությունը շարունակի գործել՝ ապահովելով առաջնագիծն անհրաժեշտ ամեն ինչով, ապա անհրաժեշտ է անել ամեն ինչ չվարակվելու համար`պահպանելով սանիտարահամաճարակային բոլոր կանոնները։
«Հետևաբար, խնդրում, հորդորում ու պահանջում եմ լինել ծայրահեղ զգոն և ուշադիր, շարունակել դնել դիմակ, պահպանել առնվազն 1,5 մետր հեռավորություն, պարբերաբար ախտահանել ձեռքերը և զերծ մնալ անհարկի շփումներից»,–գրել է Ավինյանը:
Հայաստանը COVID-19-ի դեմ պատվաստանյութ կգնի. արդեն համաձայնագիր է ստորագրվել
Նա հիշեցրել է, որ արդեն 10 օրից ավելի է՝ Հայոց բանակը պայքար է մղում ադրբեջանաթուրքական ագրեսորների ու նրանց վարձկան-ահաբեկիչների դեմ՝ հանուն բոլորիս ապրելու իրավունքի և Հայաստանի, Արցախի ու Սփյուռքի հարատևության։ Ուրեմն այս օրերին պետք է ամեն կերպ աջակցենք առաջնագծում կանգնած մեր հերոս զինվորներին: Իսկ առաջնագիծն ամուր է, երբ ամուր է թիկունքը։
Նշենք, որ միայն վերջին օրում Հայասատանում կորոնավիրուսով վարակվածների թիվն ավելացել է 6722–ով և դարձել 53 755։
