ԵՐԵՎԱՆ, 23 ապրիլի-Sputnik. Այսօր երեկոյան Բելգիայում կընթանա մոմավառություն՝ հայոց ցեղասպանության զոհերի հիշատակին: Իսկ վաղը՝ ապրիլի 24-ին, տեղի ժամանակով 10:00-ին Բրյուսելի հայկական եկեղեցում կմատուցվի սուրբ պատարագ, հիշատակի խոսքեր կհնչեն Բրյուսելի խաչքարի մոտ: Այնուհետև, ժամը 16:00-ին կկազմակերպվի հավաք-քայլերթ:
«Հավաքին ակնկալում ենք մոտ 2000 մարդու ներկայություն: Կմասնակցեն ինչպես հայեր, այնպես էլ օտարերկրացիներ: Ներկա կլինեն Բելգիայի պատգամավորներն ու սենատորները, ինչպես նաև երկրի մշակույթի նախարարը Ալդա Գրեոլին»,- Sputnik Արմենիայի հետ զրույցում ասաց կազմակերպիչներից մեկը՝ Արտակ Սերգոյանը:
«Մենք բոլորս հայ ենք». այս կարգախոսով դեռևս նախորդ տարի Բրյուսելում ընթացավ խաղաղ հավաք:
«Ապրիլի 24-ին յուրաքանչյուր քրիստոնյա զայրույթի և, միաժամանակ, տխրության զգացողություն է ունենում: Ամեն տարի ապրիլի 23-ին ու 24-ին մենք հավաքվում ենք հարգանքի տուրք մատուցելու հայոց ցեղասպանության զոհերի հիշատակին»,- ասում էր հավաքի մասնակիցներից մեկը:
