ԵՐԵՎԱՆ, 25 հոկտեմբերի — Sputnik. Տնտեսագետ Արտակ Մանուկյանը համոզված է, որ գազի գինը Հայաստանում պետք է իջնի։
«Աշխարհում գազի գինը գնալով նվազում է, և հիմա այն գինը, որ Հայաստանը վճարում է սահմանին, շատ ավելի բարձր է, քան ԵԱՏՄ անդամ այլ երկրների՝ Բելառուսի կողմից գնվող կամ Ղազախստանի կողմից վաճառվող գազի գինը: Մեր գինը համադրելի է գրեթե պատերազմի մեջ գտնվող Ուկրաինայի գնին, որից վերջինը հրաժարվեց»,- ասում է տնտեսագետը:
Արտակ Մանուկյանն արձանագրում է, որ ՌԴ-ում տնային տնտեսությունների համար գազի գինը 50 դոլար է, Հայաստանում՝ ավելի քան 300: Այս հանգամանքը, նրա մեկնաբանմամբ, վկայում է, որ գազի գնի նվազեցման հնարավորություններ կան, հատկապես, որ «Գազպրոմ Արմենիան» ռուսական «Գազպրոմի» դուստր ձեռնարկությունն է և, ըստ էության, պատկանում է նույն սեփականատիրոջը:
Բայց դրան հասնելու համար, տնտեսագետի խոսքով, գազի գինը նախ պետք է նվազեցվի սահմանի վրա, ապա սահմանից դեպի տնային տնտեսություններ, որտեղ բազմաթիվ ուսումնասիրությունների համաձայն` ծախսերը գերագնահատված են և կան չարաշահումներ:
Կառավարության գործունեության ծրագրով նախատեսված է մինչև 2016 թվականի ավարտը գազի և էլեկտրաէներգիայի սակագնային քաղաքականության մեջ ներդնել սոցիալական աստիճանականությունն ապահովող մոտեցումներ: Բացի այդ, ջերմոցային, գյուղմթերքի վերամշակման և մի շարք այլ տնտեսությունների և որոշակի ծավալից ավելի գազ սպառող խոշոր ձեռնարկությունների համար կսահմանվեն արտոնյալ սակագներ:
Արտակ Մանուկյանն ասում է, որ աշխարհը վաղուց է քայլ կատարել դեպի գազի գնի տարբերակված մոտեցման քաղաքականություն: Ավելի շատ եկամուտ ունեցողներն ու ավելի շատ սպառողներն ավելի շատ են վճարում, քիչ վաստակողներն՝ ավելի քիչ: Նշենք, որ Հայաստանում այժմ հակառակն է. 1000 խմ-ից ավելի սպառող բաժանորդները ավելի ցածր սակագնով են վճարում:
Թե ինչ փոփոխություններ կլինեն մինչև տարեվերջ, տնտեսագետը դժվարացավ կանխատեսել, բայց նշեց, որ եթե կառավարության խոստումներն իրական են, գազի սակագինը մեր երկրում կմոտենա Եվրոպական երկրների սահմանին գործող սակագներին:
«Դրանով էլ պայմանավորված կլինի վարչապետի հայտարարությունների լրջությունն ու մեր երկրում փոփոխություններ անելու քաղաքական կամքը»,- ասաց նա:
Արտակ Մանուկյանը հիշատակեց մեկ կարևոր հանգամանք ևս. 2019թ-ից ԵԱՏՄ տարածքում անդամ երկրների համար պետք է ստեղծվի միասնական էներգետիկ շուկա, որի տրամաբանությունն այն է, որ այդ երկրները պետք է միմյանց հետ համաձայնեցնեն նաև գազի և էլեկտրաէներգիայի սակագները:
