ԵՐԵՎԱՆ, 19 սեպտեմբերի – Sputnik. ՀՀ ԱԱԾ նախկին տնօրեն Արթուր Վանեցյանն ընտանիքի հետ մեկնել է Վրաստանի մայրաքաղաք Թբիլիսի։ Նա այս մասին գրել է Instagram–ի իր էջում։
«Ընտանիքիս հետ այս օրերին գտնվում ենք Թբիլիսիում 🇬🇪։ Լուսանկարում իմ լավ ընկերներ Վրաստանի ՆԳՆ նախարար Վախթանգ Գոմելաուրին է և պետական անվտանգության ծառայության պետի ժամանակավոր պաշտոնակատար Գրիգոլ Լիլուաշվիլին»,– լուսանկարին կից գրել է նա:
Հիշեցնենք` սեպտեմբերի 16-ին ՀՀ վարչապետ Նիկոլ Փաշինյանը հայտնեց, որ ստորագրել է ԱԱԾ տնօրեն Արթուր Վանեցյանի հրաժարականի միջնորդությունը։ Դրան հաջորդեց Վանեցյանի հայտարարությունը։ Սեպտեմբերի 18-ին ՀՀ նախագահ Արմեն Սարգսյանի հրամանագրով պաշտոնից ազատվեց նաև Վալերիյ Օսիպյանը։ Ավելի ուշ նա նույնպես հայտարարություն տարածեց՝ նշելով, որ իր հեռանալու պատճառների մասին կխոսի ավելի ուշ։ Այս աղմկահարույց իրադարձություններից հետո հրապարակվեց Փաշինյանի որոշումը, ըստ որի` Օսիպյանը նշանակվեց ՀՀ վարչապետի գլխավոր խորհրդական։
Կառավարության աշխատակազմի ղեկավար Էդուարդ Աղաջանյանը սեպտեմբերի 18-ին հայտնեց, որ ԱԱԾ տնօրեն Արթուր Վանեցյանը և ոստիկանապետ Վալերի Օսիպյանն ազատվել են պաշտոններից, որովհետև նրանց գործունեությունը չի գոհացրել Հայաստանի վարչապետ Նիկոլ Փաշինյանին։
